Full Flash Guide

تعليمات مهمة قبل ما تبدأ

تأكد إن جهازك مشحون كويس واعمل نسخة احتياطية من أي داتا مهمة قبل ما تفلش.

كل الملفات وروابط التحميل اللي هنذكرها هتكون متاحة تحت في قسم "خيارات التحميل".

بص على قسم 'مواضيع ذات صلة' في القايمة الجانبية في الصفحة الرئيسية، هتلاقي حلول لكل المشاكل اللي ممكن تقابلك.

اتبع الخطوات دي عشان تفلش ريكفري معدل، روم معدل وماجيسك على جهازك تاب A 10.1 (SM-T585):

تجهيز التاب قبل ما نبدأ

الخطوة 1: فعل خيارات المطور عن طريق إنك تروح للإعدادات وبعدين "حول الجهاز" وتدوس على "رقم الإصدار" 7 مرات لحد ما الخيار يتفعل.
الخطوة 2: ارجع لقائمة الإعدادات واختار "خيارات المطور".
الخطوة 3: فعل "USB debugging" و "OEM unlocking".

لو ما فتحتش البوت لودر (الخطوة 3) قبل ما تعمل أي تعديلات على جهازك، هيظهرلك الرسالة دي لما تعيد تشغيل الجهاز بعد التفليش:

Custom binary blocked by FRP lock.

لو ما اتبعتش الخطوات اللي فاتت وظهرتلك الرسالة دي، هتحتاج تفلش السوفت وير الأصلي للجهاز، وهتلاقي رابط شرح ليه تحت. لو واجهتك أي مشاكل، تقدر تنضم لجروب التليجرام بتاعنا عشان نساعدك.

الخطوة 4: اطفي الجهاز باور، وبعدين دوس على زرار الهوم وزرار الباور وزرار خفض الصوت في نفس الوقت عشان تدخل وضع الداونلود.

تجهيز برنامج أودين

الخطوة 1: ثبت تعريفات USB الخاصة بسامسونج على الكمبيوتر [ لازم تثبتها ].
الخطوة 2: نزل وشغل برنامج أودين على الكمبيوتر.
الخطوة 3: وصل التاب بالكمبيوتر باستخدام وصلة USB.

تأكد إن برنامج أودين شاف الجهاز (هتلاقي رسالة بتقول "added!!!").

لو الجهاز مش ظاهر علي أودين، تأكد من وصلة الـ USB وأنك ثبت تعريفات تعريفات الـ USB على الكمبيوتر بشكل صحيح.

الخطوة 4: في برنامج أودين، دوس على زرار AP عشان تختار ملف 'TWRP file.tar' اللي نزلته على الكمبيوتر.
الخطوة 5: روح لـ "Options" وشيل علامة الصح من مربع "Auto Reboot".

خيارات التحميل

تعريفات USB أودين ريكفري TWRP

تفليش ريكفري معدل

الخطوة 1: دوس "Start" في برنامج أودين عشان تبدأ عملية التفليش.

هتظهرلك علامة خضرا بتقول PASS! لما العملية تخلص.

الخطوة 2: دوس على زرار خفض الصوت وزرار الهوم وزرار الباور في نفس الوقت مطول عشان تطفي الجهاز.

وأول ما يطفي دوس علي طول على زرار رفع الصوت وزرار الهوم وزرار الباور في نفس الوقت لحد ما يظهر شعار سامسونج على الشاشة.

ملحوظة: ريكفري TWRP بيسألك إذا كنت عايز تستخدمه في وضع 'القراءة فقط'. وضع 'القراءة فقط' معناه إنه هيفضل موجود على جهازك من غير ما يعمل أي تغييرات لحد ما تعمل إعادة تشغيل. ببساطة، اسحب السهم عشان تسمح بالتعديلات.

في وضع الريكفري المعدل

الخطوة 1: اختار 'Wipe' وبعدين 'Format data' وأكد بـ 'yes'.
الخطوة 2: ارجع للـ TWRP home، اختار 'Reboot' وبعدين 'Recovery'.

لو مش عايز تثبت روم معدل وعايز تفضل على الروم الأصلي، ممكن توقف عند الخطوة دي وتختار "Reboot" وبعدين "System". أو ممكن تكمل لـ قسم "تفليش ماجيسك" لو عايز تعمل روت لجهازك.

مصطلحات هتقابلك

أنواع الرومات:

Vanilla - Gapps - MicroG

Vanilla: روم خالي من خدمات وتطبيقات جوجل، طبعًا تقدر تضيف ليها خدمات جوجل عادي، وده طبعًا اختياري والملف هيكون مرفق مع الروم في روابط التحميل.

Gapps: روم يحتوي على خدمات وتطبيقات جوجل الأساسية مثل Play Store و Gmail.

MicroG: روم بديل لخدمات جوجل مع تركيز على الخصوصية والبدائل المفتوحة المصدر، مثل رومات EOS. وطبعًا لو مش هتقدر تستغني عن خدمات جوجل فمنصحكش بالرومات دي لأن مش هتناسبك.

الفرق بين:

Custom ROM - Port - GSI

Custom ROM: هو روم مخصص بيتم تطويره من مطورين مستقلين علشان يشتغل على أجهزة معينة أو مجموعة أجهزة، وعادة بيضيف مميزات أو تعديلات عن النظام الرسمي.

Port: هو بورت لروم تم تعديله يدويًا علشان يشتغل على جهاز تاني غير الجهاز اللي كان مخصص ليه، وغالبًا بيحتاج تعديلات علشان يشتغل كويس على الجهاز الجديد.

GSI: هو روم عام ومفتوح المصدر، وبيتم تصميمه ليشتغل على مجموعة كبيرة من الأجهزة اللي بتدعم Project Treble. الروم ده بيتم تعديله وتخصيصه علشان يعمل على الأجهزة المختلفة، وبيتيح للمستخدمين تجربة أحدث إصدار من أندرويد بدون الحاجة لانتظار تحديثات رسمية من الشركات المصنعة. GSI مش مدعوم على التاب، لكن دي ملحوظة من باب العلم بالشئ مش أكتر.

تفليش الروم المعدل

الخطوة 1: كرر عملية 'Wipe' بس المرة دي اختار 'Advanced Wipe' وبعدين اختار كل الخيارات (ما عدا SD Card و USB OTG).
الخطوة 2: ارجع للصفحة الرئيسية الخاصة بـ 'TWRP' وبعد كده اختار 'Install'، واختار مكان التخزين (اللي حطيت عليه ملف الروم المعدل بتاعك سواء حطيت الملف على SD Card، أو USB OTG، أو Internal Storage). وطبعاً تقدر تنقل ملف الروم وملف خدمات جوجل من الـ PC للتاب بسهولة باستخدام كابل الـ USB.
الخطوة 3: اختار ملف الـ zip الخاص بالروم المعدل بتاعك.
الخطوة 4: دوس على 'Add More Zips' واختار ملف GApps اللي جاي مع الروم لو كان بيحتاجه.
الخطوة 5: اسحب السهم عشان تأكد التفليش واستنى لحد ما عملية التفليش تخلص، وبعدين دوس 'reboot system'.

ملحوظة: في قسم رومات أندرويد 10، هتلاقي نسخة معدلة من واجهة One UI 2.0، ومعاها ملف اسمه 'create vendor'. لازم تفلش الملف ده، وبعدين تعمل إعادة تشغيل للريكفري، وبعد كده تفلش البورت.

لو فلشت ملف 'Create Vendor' وظهرلك الخطأ ده:

Updater process ended with ERROR: 127

يا ريت تستخدم ريكفري OrangeFox اللي فيه ميزة Vendor Support، وده برضو موجود مع الروم

ملحوظة: لو ثبت روم معدل على جهازك وعايز تغير لروم معدل تاني، لازم تعمل خطوة Advanced Wipe تاني (الخطوة 1) الأول، وبعدين تفلش الروم اللي عايز تغير ليه.

ملحوظة: لو ثبت أي روم معدل على جهازك وعايز ترجع لنسخة One UI 1 المعدلة الموجودة في قسم رومات أندرويد 9، لازم تفلش السوفت وير الأصلي للجهاز الأول وبعدين تكرر الخطوات اللي فاتت تاني.

ملحوظة: "Dirty Flash" معناه إنك تفلش نسخة جديدة من الروم بتاعك فوق النسخة اللي عندك من غير ما تستخدم خيار "Wipe Data/Advanced Wipe/Factory Reset" في الريكفري. وحتى لو كنت ناوي تعمل 'Dirty Flash'، لازم تمسح cache وdalvik cache.

خيارات التحميل

رومات معدلة تفليش السوفت وير الأصلي